DK. MWINYI ARIDHISHWA UTENDAJI KAZI WA TAMISEMI

 


Rais wa Zanzibar na Mwenyekiti wa Baraza la Mapinduzi Dk. Hussein Ali Mwinyi ameeleza kutoridhishwa na utendaji kazi wa Mamlaka za Tawala za Mikoa na Serikali za Mitaa yakiwemo Mabaraza ya Miji na Manispaa za Zanzibar.

 

Rais ameyasema hayo alipokutana na viongozi wa Serikali za Mitaa kutoka mikoa yote ya Zanzibar wakiwemo Wakuu wa Mikoa na Wakuu wa Wilaya zote za Unguja na Pemba, Ikulu Zanzibar.

 

alieleza kwamba lengo la kikao hicho ni kuhakikisha mabadiliko chanya yanatokea hasa katika Halmashauri za Unguja na Pemba sambamba na kuimarisha utendaji wa kazi kwa azma ya kuwahudumia ipasavyo wananchi.

 

Katika mazungumzo hayo, Rais Dk. Mwinyi alieleza haja kwa kila Halmashauri ihakikishe inatekeleza ipasavyo majukumu yake ikiwa ni pamoja na kuzisimamia fedha za makusanyo ya mapato na kuwataka Wakuu wa Mika na Wilaya kusimamia hilo ili fedha hizo ziweze kusaidia shughuli za maendeleo.

 

Rais Dk. Mwinyi aliyaeleza majukumu ya Serikali za Mitaa ikiwa ni pamoja na kusimamia  suala zima la usafi katika maeneo yote ya Miji ya Zanzibar hasa ikizingatiwa kwamba Zanzibar ni eneo maarufu la utalii.

 

Aidha, Rais Dk. Mwinyi alieleza kwamba makusanyo ya Halmashauri ni lazima yatumike kwa ajili ya maendeleo ya nchi na wananchi wake.

 

Rais Dk. Mwinyi alieleza jukumu la Manispaa zote za Unguja na Pemba katika kuhakikisha miji inakuwa safi huku akiutaka uongozi wa Tamisemi kuwashajiisha wananchi kufanya usafi katika maeneo yote wanayoishi yakiwemo maeneo ya biashara.

 

Alieleza haja kwa wafanyabiashara wadogo wadogo kupangwa vizuri  na kusisitiza kufanya biashara katika maeneo maalum yaliyopangwa.

 

Rais Dk. Mwinyi pia, alieleza azma yake ya kuendelea kuwasaidia na kuwaunga mkono Wajasariamali kwa kutoa kiasi cha fedha zipatazo Bilioni 70 zilizotolewa na Shirika la Fedha Duniani (IMF) kwa ajili ya kuwasaidia ambapo wenye jukumu la kusimamia fedha hizo ni Serikali za Mitaa.

 

Pamoja na hayo, Rais Dk. Miwnyi alieleza jukumu la Uongozi wa Mikoa na Wilaya la kusimamia suala zima la ulinzi na usalama ili kuhakikisha vitendo viovu vinakomeshwa katika jamii.

 

Sambamba na hayo, Rais Dk. Mwinyi alisisitiza haja kwa Masheha wa Shehia zote za Unguja na Pemba kutekeleza shughuli zao kwa uadilifu zaidi ili kuweza kuwatumikia wananchi ipasavyo katika maeneo yao.

 

Nao viongozi hao wa Serikali za Mitaa walitoa pongezi zao kwa Rais Dk. Mwinyi kwa maelekezo mazuri aliyowapa pamoja na kuwatia moyo katika utendaji wao wa kazi na kuahidi kuleta mabadiliko katika kipindi kifupi kijacho.